СӨ Ил Дарханын Харыйата сылын аайы үтүө үгэскэ кубулуйан, өрөспүүбүлүкэбит бары муннуктарыттан бу сылга ситиһиилээх оҕолору, олимпиада, араас куонкурустар, научнай-практическай конференциялар, спортивнай күрэстэр бастыҥнарын биир түһүлгэҕэ, государственнай цирка дьиэтигэр түмэр. Быйылгы тэрээһиҥҥэ Горнай улууһуттан 13 оҕо кыттар чиэскэ тигистэ.
Бу күн бастыҥ үөрэнээччилэри Ил Дархан Айсен Сергеевич Николаев кэргэнинээн Людмила Валерьевналыын, СӨ үөрэх миниистирэ Владимир Егоров, СӨ култуура уонна духуобунай сайдыы миниистирэ Юрий Куприянов, Ил Түмэн спикерэ Петр Гоголев, Ил Түмэн Государственнай Мунньаҕын бэрэссэдээтэлин солбуйааччы Антонина Григорьева, Дьокуускай мээрэ Сардаана Авксентьева эҕэрдэлээтилэр.
Айсен Сергеевич Николаев, СӨ Ил Дархана:
– Эһиги үөрэххэ, спорка ситиһиилэргит, хорсун быһыыгыт – барыта өрөспүүбүлүкэбит сайдар кэскиллээҕин көрдөрөр. Үөрэниҥ, сайдыҥ, сырдык эрэллээх иннигит эрэ диэки көрүҥ, оччоҕо барыта кыаллыа, сатаныа. Кэлэн иһэр Саҥа дьылынан, Ороһуоспанан!
Быйылгы Ил Дархан Харыйатыгар Горнайтан 13 оҕо сылдьар чиэскэ тигистилэр:
Михаил Тимофеев, С.П.Данилов аатынан Бэрдьигэстээх орто оскуолата, химия, биология, география, история предметтэригэр улуустааҕы олимпиада, улуус баһылыгын Гранын кыайыылааҕа.
Айсен Варламов, С.П.Данилов аатынан Дьиикимдэ орто оскуолата, улуустааҕы КВН кыайыылааҕа, өрөспүүбүлүкэтээҕи обществознание, история олимпиадаларын, “Чугуновскай ааҕыылар” кыттыылааҕа, боксаҕа өрөспүүбүлүкэтээҕи күрэс кыайыылааҕа.
Алена Никифорова, А.Н.Осипов аатынан Бэрдьигэстээх орто оскуолата, туйгун үөрэнээччитэ, актыбыыһа.
Леонид Сергеев, С.И.Тарасов аатынан Өрт орто оскуолата, туйгун үөрэнээччи, Россиятааҕы математика, физика, биология, обществознания олимпиадаларын кыайыылааҕа, “Вордскилс” муниципальнай этаабын призера, хайыһарга, биатлоҥҥа, футболга улуустааҕы түһүмэхтэр кыайыылааҕа, улуустааҕы “Снежный барс” байыаннай-спортивнай оонньуу призера, “Сардааналаах Аартык” өрөспүүбүлүкэтээҕи ырыа, үҥкүү куонкуруһун лауреата, “Еврофолк” IХ фольклорнай чемпионат Гран-при хаһаайына
Александра Прокопьева, Кэптин орто оскуолата, улуустааҕы “Инникигэ хардыы”, “Харитоновскай ааҕыы” 3 степеннээх кыайыылааҕа, дзюдоҕа өрөспүүбүлүкэтээҕи турнирга уонна чемпионакка 2, 3 миэстэлээх.
Виктория Агеева, улуустааҕы гимназия, туйгун үөрэнээччи, “Пять шагов до МИИ” Норуоттар икки ардыларынааҕы интеллектуальнай оонньуу кыайыылааҕа, улуустааҕы “Вордскилс” куонкурус 2 миэстэлээх, улуустааҕы география, нуучча литературата, саха тыла, информатика олимпиадаларын кыайыылааҕа, “Инникигэ хардыы” улуустааҕы этааптарын кыайыылааҕа, эдэр суруналыыстар улуустааҕы куонкуруһун кыайыылааҕа.
Диана Румянцева, Кировскай орто оскуолата, саха литературатын, экология, ОБЖ улуустааҕы олимпиадаларын кыайыылааҕа, өрөспүүбүлүкэтээҕи “Снежный барс” байыаннай-спортивнай оонньуу кыайыылааҕа.
Ирена Жиркова, Күөрэлээх орто оскуолата, туйгун үөрэнээччи, 6-с Норуоттар икки ардыларынааҕы “Бриллиантовые нотки” фестиваль 2-с степеннээх дипломана, “Радуга Севера-2019” улуустааҕы быыстапкаҕа 1 миэстэ, улуустааҕы хайыһар күрэһигэр 3 миэстэ, улуустааҕы “Аввакумовскай ааҕыыларга” 2 степеннээх дипломнаах..
Роман Черепанов, Маҥаны орто оскуолата, 2017-2019 сс. астрономия, экономика олимпиадаларын кыайыылааҕа, “Харитоновскай ааҕыылар” 3 степеннээх дипломнаах, “Юниорскай ааҕыылар” лауреата.
Сардаана Безносова, Л.Н.Харитонов аатынан Маҕарас орто оскуолата, туйгун үөрэнээччи, улуустааҕы олимпиадалар кыайыылааҕа, “Сотворение будущего” куонкуруска 3 миэстэ, “Харитоновскай ааҕыыларга” 2 миэстэ, улуустааҕы хабылык, хаамыска күрэхтэһиитигэр 1 миэстэ.
Юлиана Васильева, В.Д.Лонгинов аатынан Атамай орто оскуолата, нуучча тылыгар, литературатыгар, физикаҕа, обществознанияҕа, историяҕа, математикаҕа, быраапка, астрономияҕа, педагогикаҕа, психологияҕа, политехническэй наука, предпринимательство олимпиадаларын кыайыылааҕа, «Харитоновскай ааҕыылар” призера, “Кочневские чтения” 3 миэстэлээх, “Лонгиновскай ааҕыыларга” 1 миэстэ, өрөспүүбүлүкэтээҕи “Бэйэн дьыалаҕын арын” бизнес бырайыактар куонкурустарыгар 3 миэстэлээх.
Ону таһынан, эмиэ үгүс ситиһиилээх, бастыҥ актыбыыстары А.Н.Осипов аатынан Бэрдьигэстээх орто оскуолатын үөрэнээччилэрин Сахаяна Алексееваны уонна Герман Копылову СӨ Үөрэх Министиэристибэтин анал бирикээһинэн ыыттылар.
Улууспут бастыҥ үөрэнээччилэрэ Ил Дархан Харыйатыгар астына сынньаннылар, салгыы да ситиһиилээхтик үөрэнэллэригэр күүс-сэниэ ыллылар. Чахчы да сылы мэлдьи күүстээх үлэ түмүгэ бу курдук чиэстэнэрэ оҕолору өссө үрдүккэ кынаттыа, саҥаттан-саҥа кирбиилэри дабайарга угуйуо, көҕүлүө турдаҕа. Кинилэр үгүс ситиһиилэрэ – улууспут бары оҕолоругар үтүө холобур буоллун.
Ааптар: Күннэй Алексеева.
Сообщение Горнайтан Ил Дархан Харыйатыгар 13 оҕо сырытта появились сначала на Ulus.Media — все главные новости из районов Якутии.